Кыргыз элинин улуу эпосу “Манас” өзүнүн жандуулугу жана улуу идеялары менен дүйнө элдеринин эпосторунун арасында өзгөчө орунду ээлейт. Ал кыргыз элин биримдикке чакырган, руханий жана маданий кодду сактаган негизги баалуулук.
“Манас” эпосу – кыргыз элинин руханий дөөлөттөрүнүн туу чокусу. Кыргыз улутунун тили менен бирге, аны дүйнөгө тааныткан да, бириктирген да “Манас”. Ушул баалулукту кийинки муундарга өткөрүп берүү – азыркы мезгилдин негизги милдеттеринин бири.
Маалымат майданы – биригүү идеясынын борбору
“Манас” Улуттук академиясы жаңы демилгени көтөрүп чыгып, “Манас маалымат майданын” түптөөгө киришти. Бул майдан эпостогу улуу идеяларды жаңыча ыкма менен элге жеткирүү, элден ашып, эл аралык деңгээлде таанытуу максатын көздөйт. Академиянын вице-президенти Назира Аалы кызы белгилегендей:
“Манас деген бул өтө чоң тема, океандай болгон. Анын негизги өзөгүндө биримдик жана мамлекеттүүлүк идеясы жатат.”
Назира Аалы кызы “Манас маалымат майданын” түзүү жана аны өнүктүрүү бүгүнкү күндүн чакырыктарына жооп берүү үчүн маанилүү экенин баса белгиледи. Ааламдашуу доорунда улуттук баалуулуктарды сактоо жана дүйнөгө таанытуу үчүн маалыматтык иштерди жаңыча ыкмалар менен жүргүзүү зарыл.
Жаңы муунга жаңыча жол менен
Улуттук академия журналисттерди жана блогерлерди даярдоо аркылуу маалыматтык иш-чараларды күчөтүүнү көздөп жатат. Назира Аалы кызы белгилегендей, бүгүнкү күндө маалыматты башкаргандар дүйнөнү башкарат:
“Журналисттер жана блогерлер окуя жаратуучулар болуп калды. Алар айтса, жазса – ал чындык катары кабыл алынат.”
Ошондуктан “Манас” эпосунун идеяларын жайылтууга арналган маалымат майданын жаңыртуу, сөздүн баркын кайтаруу жана элди “Манас” аркылуу биримдикке чакыруу негизги максаттардын бири болуп саналат.
“Манас” – азыркы заманга жооп берүүчү идеялар булагы
Академия бул багытта атайын тренингдерди, семинарларды өткөрүп, маалымат айдыңындагы адистерди даярдоого өзгөчө көңүл бурат. Манасчы Рыспай Исаков баса белгилегендей:
“Эртеңки муунга бүгүнкүдөн жакшы кылып өткөрүп берели.”
“Манас” эпосу бүгүнкү глобалдык чакырыктарга, анын ичинде улуттук жана жалпы адамзат коопсуздугуна байланышкан маселелерге терең жооп берет. Бул улуу мурас ар бир кыргыздын жүрөгүндө жашап, аны улуттук биримдиктин символу катары сактоосу керек.
“Манас маалымат майданы” улуттук идеологияны чыңдоо жана кыргыз элин дүйнөгө таанытуунун жаңы этабына кадам таштап, бүткүл элди биримдикке чакырган эпостун улуу идеяларын жайылтууга жол ачат.
“Манас” – бул өткөндөн калган тарыхый мурас эмес, бүгүнкү күндүн жана келечектин жандуу күчү. Кыргыз элинин руханий дөөлөттөрүн, биримдик жана тилектештик идеяларын сактоо жана жайылтуу ар бирибиздин ыйык милдетибиз.